Aneka Maskumambang

Maskumambang

1.     Analangsa ngalumpruk bayu

ngalentrih,

asor kasangsara,

kasurang-surang ing urip,

urip neng jaman jajahan.

2.     Nadyan duwe kuwanen

ingkang linuwih,

wurung tan kuwasa,

tinindhes tan bisa tandhing,

mring dhendhaning kang pidana.

3.     Nistha papa luwih aji

godhong garing,

nadyan bisa dadya,

radyan Bei pangkat inggil,

tetep alating jajahan.

4.     Kanggo pranti mbalenggu

bangsa pribadi,

ben padha bentrokan,

bubrah datan bisa budi,

sing njajah abungah-bungah.

5.     Penget iki pepethan mangka

pepeling,

tumrap para putra,

dadia tepa palupi,

tetepa madeg mardika.-

 

 

Maskumambang

1.     Wong tan manut tuture

wong tuwa ugi,

pan nemu duraka,

ing donya tumekeng akir,

tan wurung kasurang-surang.

2.     Maratani mring anak putu

ing wuri,

den padha prayitna,

aja na kang kumawani,

ing bapa tanapi biyung.-

Maskumambang

Heh Harjuna sira sisip ing pakarti,

tan pracaya Kresna,

mung nguja hardaning kapti,

temah asor ing ngayuda.-

Maskumambang

Marma urip ywa ngumbar hardanireki,

begja myang cilaka,

sayekti amung sadermi,

angundhuh pakartinira.-