Aneka Megatruh

Megatruh

1.     Awak semplah ras-arasen

pijer mbekuh,

pikiran bundhel kepati,

sinau tan bisa mlebu,

pijer ngantuk kethap-kethip,

theklak-thekluk tansah angop.

2.     Mangka sesuk wis

dikandhani pak guru,

apalan arep dibiji,

baya piye polahingsun,

apalane durung kasil,

sababe pijer sumados.

3.     Iya iku pikolehe bocah

mbesur,

sekolahe digegampil,

kakehan gojeg kalantur,

lamun dolan lali wanci,

aja mangkono nak ingong.

4.     Wekasaning taun banjur

agegetun,

nora munggah pangkat inggil,

mbaleni klase rong taun,

iku kapitunan yekti,

lah mula sing ngatos-atos.-

 

 

Megatruh

[ Sabdajati : R.Ng. Ranggawarsita ]

1.     Ki Pujangga nyambiwara

weh pitutur,

saka mangunahing Widhi,

ambuka warananipun,

aling-aling kang ngalingi,

angalingkap temah katon.

2.     Para janma sajrone jaman

pakewuh,

kasudranira andadi,

dahurune saya ndlarung,

keh tyas mirong murang margi,

kasekten wus nora katon.

3.     Katuwone winawas dahad

matrenyuh,

kenyaming sasmita yekti,

sanityasa tyas malat kung,

kongas welase kepati,

sulaking janma prihatos.

4.     Waluyane benjang yen wus

ana Wiku,

memuji ngesthi sawiji, [ 1887 ] sabuk lebu lir majenun,

galibedan tudang-tuding,

anacahken sakehing wong.

5.     Iku lagi sirep jaman

Kalabendu,

Kalasuba kang gumanti,

wong cilik bisa gumuyu,

nora kurang sandhang bukti,

sedyane kabeh kelakon.

6.     Pandulune Ki Pujangga

durung kemput,

mulur lir benang tinarik,

nanging kaserang ing umur,

andungkap kasidan jati,

mulih marang jatininggon.

7.     Amung kurang wolung ari

kang kadulu,

tamating pati patitis,

wus katon neng Lokhil-makful,

angumpul ing madya ari,

amarengi ri Buda Pon.

8.     Tanggal kaping lima

antarane luhur,

Sela ing tahun Jimakir,

Tolu Huma Aryang Jagur,

Sengara winduning pati,

netepi ngumpul saenggon.

9.     Cinitra ri Buda kaping

wolulikur,

Sawal ing taun Jimakir,

candraning warsa pinetung,

Sembah Muksa Pujangga Ji

 [ 1802 ],

Ki Pujangga pamit layon.-