Aneka Salisir

Salisir

1.     Kanthi saiyeging kayun,

kita pra kanca sadaya,

sung pambagya mring pra myarsa,

manggiha suka raharja.

2.     Mugi-mugi Kang Maha

Gung,

paring nugraha mring kita,

widada nir sambekala,

manggiha suka raharja.

3.     Tan ana sawaleng kayun,

sugenge pamengku praja,

saiyeg saeka praya,

manggiha suka raharja.

4.     Panuwun kita sadarum,

mugi-mugi nagri kita,

tinebihna sambekala,

manggiha suka raharja.

5.     Mangka panutuping atur,

kita pra kanca sadaya,

nyuwun gunging pangaksama,

manggiha suka raharja.-

 

Salisir

1.     Pratandhane ambeg sadu,

nedya nggayuh kautaman,

mandireng tyas kang rinasa,

rasa rasane dumadya.

2.     Budi bebadaning kayun,

yayah satu lan rimbagan,

ginulang gelenging cipta,

antepe ingkang sinedya.

3.     Winawas aywa kaliru,

rubedaning jim prayangan,

angrencana sedyanira,

murih wurunging kalakyan.

4.     Narima awas lan emut,

mantep mantheng mring Yang Suksma,

manungsa iku sanyata,

tinitah luhur priyangga.

5.     Taliti tetep tur teguh,

guna klawan kasantikan,

kajatmikan jroning nala,

lambarana tapa brata.

6.     Suminggah tindak kang

dudu,

dedalan marang kanisthan,

ngesthia ambeg raharja,

jamake janma utama.

7.     Raras rumaket rum-arum,

maratani mring sasama,

amemayu hayuning rat,

ngambar ngebeki bawana.

8.     Karya tentreming praja

gung,

gampang antuk sandhang pangan,

[ gampang ngupa sandhang tedha ]

gemah ripah tata harja,

jinangkung karseng Yang Suksma.

9.     Ta ......

Salisir

[ lambangsari ]

1.     Pra wanita marsudia,

marang wulang kang utama,

setya tuhu marang garwa,

dadi rowang kang sembada.

2.     Ingkang bisa nuju prana,

weh reseping pamicara,

nora kengguh ing panggodha,

darbe budi kang santosa.

3.     Balik priya nimbangana,

ngayomana rabinira,

aja kemba asih tresna,

angayomi kulawarga.-

Salisir

1.     Umiyos kanjeng sang nata,

saking ing praba suyasa,

ginarebeg upacara,

kaampil srimpi bedhaya.

2.     Myang manggung

katanggung jaka,

palara-lara sadaya,

sri nata ngrasuk busana,

kaprabon tuhu respatya.

3.     Sembada bisa busana,

sanggya kang rinasuk endah,

sri nara nata sudibya,

ing tyas adil para marta.

4.     Wening ing tyas wicaksana,

putus patitising sabda,

prawira ambeg utama,

temen kertarta jatmika.

5.     Wira tama rehing nata,

sihing mring dasih warata,

marma ngenguwung tejanya,

angaweng wingit kawangwang.

6.     Sunaring nur mawa praba,

sang prabu prabawanira,

ambawani ing bawana,

tuhu kekasihing Suksma.

7.     Yata sang prabu wus

lenggah,

asri neng dhampar kencana,

baludru wulu lurupnya,

linut ing baludir emas.

8.     Sinebaran ganda wida,

minging sumrambah gandanya,

meleb keleban jro pura,

mangingsep driya asmara..-

 

 

Salisir

[ Beksan karonsih ]

1.     Sampun sawatawis dangu,

nggenira andon asmara,

karonsih dadya pratandha,

golong gumolonging karsa.

2.     Mangke sang kusumaning

rum,

kekalih anunggal sedya,

meminta dhasih Hyang Suksma,

ingkang murbeng jagad raya.-

Salisir

( Sekar Puspagiwang )

1.     Parabe sang mara bangun,

sepat domba kali oya,

aja dolan lan wong priya,

gerameh nora prasaja.

     2. Garwa sang Sindura prabu,

wicara mawa karana,

aja dolan lan wanita,

tan nyata asring katarka.

     3. Sembung langu munggwing gunung,

kunir wisma kembang rekta,

aja nggugu ujarira,

wong lanang sok asring cidra.

     4. Gentha geng kang munggwing panggung,

jawata pindha Arjuna,

jaman mengko kawruhana,

wong wadon keh ngamandaka.

     5. Kramane suwaleng kayun,

ayam kuncung sabeng wana,

padune cuwa ing karsa,

wuwuse tan merak driya.

     6. Burat pada prekutut gung,

sujanma misaya mina,

mbok iku den turutana,

dhokohe asor wong njala.

    7. Gatrane kang kembang randhu,

wogan alit tumbal wisma,

kemaruk nekakken karsa,

tan kena mengeng sedhela.

     8. Penjalin tulis ing gunung,

kramaning pulasing wayang,

sun tingali warnanira,

semune kandhuhan brangta.

     9. Sujalma mangendhang

dunung,

bremara lit taleng kisma,

kena sambang tutur baya,

wasana tan bisa nendra.-

Salisir

     1. Arum kang raras manawung,

sesanti pamudyastawa,

lenging sedya manembrama,

kang rinengga palakrama.

     2. Tumrap ingkang nembe nambut,

nikah silaning akrama,

luntura sihing Hyang Suksma,

antuk jatining nugraha.

     3. Lumampah tuntun tinuntun,

tansah ngambah marga mulya,

sing lara sing reh ruhara,

sepi godha pancabaya.

     4. Pangestuning para sepuh,

mring temanten sekalihan,

ingkang nedya mangun warga,

manggya harja suka bagya.

     5. Pangeran Kang Maha

Agung,

mugi paringa wilasa,

hamatengna jodho setya,

tumekaning swarga loka.-